Аще убо и предивно чюдо содѣяся в роде нашемъ милостивнымъ посѣтомъ Творца благому всему, Господа нашего и Бога Ісуса Христа, и рождьшей Его Пресвятыя и Преблагословеныя Владычицы нашея Богородицы и Приснодѣвыя Мария пречюдною и чюдотворною иконою въ преславномъ градѣ Казани: но како возмогу, недостоинъ сый и недостойне устнѣ имѣя, провѣщати таковая?

    Но обаче, надѣяся на неизреченныя щедроты Сына Божия и Того Рождьшия молитвы, вселенныя учителя глаголъ восприиму: благословенъ Богъ и Отецъ Господа нашего Iсуса Христа, Отецъ щедротамъ и Богъ всякия утѣхи, утѣшаяи насъ о всякой скорби нашей и благословивый насъ благословеніемъ духовнымъ. Преже убо праведный гнѣвъ свой, безакония ради нашего, вмале испусти на насъ, оцыщая многия грѣхи наша: и въ мало дней оскорбихомся. Потомъ же, благодати ради Божия, скорбная забыхомъ неизреченнаго ради человѣколюбия Божия на насъ, и радости несказанней сподобихомся, явления ради иконы Божия Матери и Тоя Превѣчнаго Младенца Господа нашего Iсуса Христа. Повсюду убо протекоша, яко громъ, во вся конца россиския земля Божие к намъ милостивное посѣщение — Богородицины иконы явление и неизреченные чюдеса, ихъже подаетъ неоскуднѣ с вѣрою приходящимъ. Мнѣ же, недостойному, самовидцу бывшу, како или коими чюдесными благотворении яви Богъ и Богородица от земныхъ нѣдръ чюдотворный Свой образъ (яко же преди простретися слово хощетъ), писанию ж предати замедлившу или отъ недостатка разума, или отъ нерадѣния и душегубителные лѣности, ово же и страха ради недостоинства: пленицами бо моихъ грѣховъ стягнутъ есмь и таковымъ преславнымъ вещемъ нелѣпо ми бѣ коснутися, но развѣ точию безаконня моя знати и просити отпущения безчисленымъ моимъ согрѣшениемъ. Но понеже желание привлачитъ мя и страхъ глаголати нудит мя, грѣси же мои, яко бремя тяжко, отяготѣша на мнѣ: и что убо сотворю? дерзну ли к начинанию? что убо? реку ли или запрещу себѣ окаянства ради моего? или паки внимаю восходящая на сердце мое блаженьствомъ о Всепѣтей, и Богоприятней Богородицы и Приснодѣвѣй Марии? Но Ты Сама содѣйствуй ми, о Преблагословеная, Заступнице Усердная, Мати Бога Вышняго, яко да воля иже ис Тебе рождьшагося Христа Бога нашего будетъ: да ми, недостойному, помрачивыйся умъ мой тобою, о Всенепорочная, просвѣтится (ты бо за всѣхъ молиши сына своего, Христа Бога нашего) и пишущу ми содѣйствуй: всѣмъ бо твориши спастися, в державный Ти покровъ прибѣгающимъ. Множицею бо воспомянухъ, нѣкогда же и слезы испустихъ, вѣдый мое недостоинство. Но обаче и се ми во умъ прииде, яко неправедно есть Божиихъ таинъ и неизреченныхъ к намъ и многомилостивныхъ дорованиихъ в забвения глубине погружати, имже многимъ источникомъ целебнымъ и самовидецъ быхъ: и, елико видѣхъ и слышахъ о пречюдней Ти иконе, подай ми, о Всепѣтая, глаголати и писати, и всѣхъ насъ заступи, Госпожа Царице. Аще по достоянию и нѣсмь достоинъ похвалы Тебѣ принести, малы нѣкия отъ великихъ; но обаче сподоби мя, о Владычице, о Твоихъ неизреченныхъ на насъ благодѣянихъ хвалу Тебѣ принести; и яко же сподобила мя еси, о Всеблаженая, недостойнаго и грѣшнаго, скверными моими руками преже всѣхъ священныхъ прикоснутися пречистому Твоему образу и чюдотворнай иконе и Сына Твоего Христа Бога нашего. Аще бо и вси достойни, но аз недостоинъ сый: но обаче влекомъ жадая, да поне прикоснуся пречистому Твоему и чудотворному образу, Владычице, и Превѣчнаго Ти младенца Спаса Христа.

    Нынѣ же паки что реку или что возглаголю великоименитей Дѣвѣй, паче же рещи многоименитей, пророки прореченнѣй? Пять убо к десятимъ лѣтомъ преидоша явлению чудотворныя Богородицыны иконы, чюдесная же исцеления безпрестани неоскудно бываютъ, и вся страсти душевныя и недуги телесныя немедленно от человѣкъ отгоними бываютъ. Сие паки призываетъ мя к торжеству и глаголати понуждаетъ: и яко подобаетъ ми и писанию сия предати, да не буду осуженъ, якоже и скрывый талантъ господина своего. Понеже убо человѣческий родъ обыче и святыхъ памяти духовные с похвалами празновати, а иже Пресвятѣй и Преславней Царице царски празники празновати, Пречистыя Богородицы и Приснодѣвы Мария, — сию попремногу паче онѣхъ любовию почитати должны есмы (Та бо есть божественый покровъ рабомъ своимъ), и притецати к тихому сему и доброму Пристанищу, скорой Помощнице, готовому и теплому Спасению, Покрову Дѣвыя; и яко Вышшей і паче всѣхъ тварей вышшую похвалу принести, яко Царице и Владычице царя и Владыку всѣхъ рождьшую: Тоя бо ради праматерняя клятва потребися и Адамъ отъ вѣчныхъ уз свободися, и Богъ к намъ примирися. Тогда бо Иаковля лѣствица утвердися. Богу хотящу по ней снити и человѣкомъ путь сотворити къ небеснымъ и человѣцы со ангелы во едино быша: не ктому, яко же тогда, со Ияковомъ древле борется, ибо Творецъ Иаковль на землю сниде, погибшую драхму взыскати хотя и Отцу принести. Тѣмже пророцы тогда возрадовашася, своему пророчеству збытіе зряще. Тогда убо Давыдъ, видѣвъ отъ сѣмени его правнуку родившуся, бряцая в гусли, играя духомъ, глаголя: слыши, дщи, и виждь, и приклони ухо твое. Тѣмже тогда не токмо пророцы, но и превышняя и земная тварь съпразноваше. Нынѣ же паки приспѣ новый празникъ честный Владычицы нашея Богородицы честнаго Ея образа иконы Одигитрия, крѣпкия помощница: да познаютъ вси, яко не токмо, егда въ мирѣ бяше, ходатайственое къ своему Творцу и Сыну показоваше, но и паче, и по преславномъ своемъ преставлении отъ земныхъ въ небесная, непрестанно милостивно насъ присѣщая. Тѣмже, оставльше начало словеси, на совершеніе ведемся шествующе. Да коснемся иже о сихъ бесѣде, елико подастъ Святый Духъ, преже похваливше ваше усердие теплое. Толико бо к церкви ваше тщание, паче-же к чюдотворней Богородицынай иконе вѣра и моление, елико чадомъ к матери, елико жаждущему ко источнику, елико кораблю къ пристанищу. Толико и насъ веселитъ преспѣяние ваше, яко нынѣ явити намъ о семъ. Грѣхъ ради нашихъ Богъ наказуя насъ и наводя на насъ милостивнѣ праведный гнѣвъ свой, овогда гладомъ, овогда нашествиемъ иноплеменныхъ, иногда моромъ и межусобными бранми, овогда пожаромъ и прочими напастьми жития, и беды и тесноты и недуги люты наводя на насъ, — понужаетъ же паче ленивыя и жестокия на благая и подобная и спасеныя пути. Се убо реченное пророкомъ Давыдомъ къ Господу: броздами и уздою челюсти ихъ востягнеши, не приближающимся к Тебѣ многи раны. I во иномъ псалмѣ глаголетъ: аще оставятъ законъ Мой и в судбахъ Моихъ не пойдутъ, аще оправдания Моя осквернятъ и заповѣди Моя не сохранятъ, посѣщу жезломъ беззакония ихъ и ранами неправды ихъ, милость же Мою не разорю отъ нихъ. Апостолъ: его-же любитъ Господь, того и наказуетъ, бьетъ бо всякаго сына, его же приемлетъ; аще безъ наказания, преблудодѣйчища есте, а не сынове. Понеже зловодими есме человѣцы и неудобно шествие имамы к добродѣтели, и мало о спасении душь нашихъ печемся, попущаетъ Владыка нашъ Господь напастми и бѣдами, и скорбми и недуги лютыми. Даже къ Нему обращаемся и о нашемъ спасении всеобразно печемся. Сия намъ содѣяшася праведнымъ судомъ Божиимъ.

    Бысть же сице. В лѣто 7087 [1579] при державѣ благочестиваго и христолюбиваго, благовѣрнаго Государя Царя и великаго князя Ивана Васильевича всея Руси Самодержца, и при его благородныхъ царевичехъ — князе Иване Ивановиче и князе Ѳеодоре Ивановиче (нынѣ же Божиею благодатию Государь, Царь и Самодержецъ всея Руси), и при святѣйшемъ митрополите Антонии Московскомъ и всея Руси, и при архиепископе Казанскомъ Иеремѣе, мѣсяца Июня 28 день, на память святыя мученицы Агрипѣны, бысть пожаръ в новопросвѣщенномъ граде Казани, по взятьи града в двадесят шестое лѣто, яко достовѣрнейши сами видѣхомъ. Загорѣся в полуденное время близь церкви святаго Николы, иже зовется Тульский, во дворѣ нѣкоего воина царева Данила Онучина. И мала нѣкая часть посаду остася, и половина града к соборней церкви и дворъ архиепископль остася. Болшая же часть посада: и торги всѣ, и во граде обитель боголѣпнаго Преображения Спасова, и дворъ великого князя — увы! вся огнь всеядец пояде и пожже и без вѣсти сотвори. Людие же христолюбивии вѣрою не отпадше, но познаша своя согрѣшения, на покаяние обратишася и начаша созидати церкви Божия и своя домы: и Божиею милостию мѣсто убо иноязычно и новопросвѣщено просвѣщашеся святыми церквами и Божественными учении. Языцы же невѣрнии мнози бяху во граде и вѣры многи. И бысть имъ в притчю и в поругание истинная православная вѣра, источника же целебнаго не бѣ тогда во граде. Иноязычнии же, невѣриемъ одержими въ сердцыхъ своихъ, уничижаху насъ, не вѣдяще Божия милости и силы: видѣша бо окаяннии Божие милоседрие къ намъ, еже с милостию наказание; еже милуяй насъ наказуя, яко отецъ чадолюбивъ, за наша согрѣшения, оцыщая грѣхи наша. Человѣколюбецъ же Богъ, видя терпѣние людей своихъ и вѣру ихъ, и поругание, и поношение окрестъ живущихъ иновѣрныхъ, и не терпя поношения и похуления на святыя иконы и да не рекутъ языцы: гдѣ есть Богъ ихъ, в него же вѣруютъ? Да заградятся уста, иже глаголютъ неправду и дабы убо исчезло и не помянулось жидовское и безсерменское суровство и тщегласное хуление ихъ, и дабы искоренилось злоплевельное еретическое учение, и утвердилась бы и просвѣтилась православная вѣра истинная християнская. греческаго закона, правымъ учениемъ Господа нашего Iсуса Христа и святыхъ его ученикъ и апостолъ и богоносныхъ отецъ и всѣхъ святыхъ, утвердившихъ православную вѣру Христову и научившихъ вѣровати «во Отца и Сына и Святаго Духа», нераздѣлимую Троицу. Предстательствомъ убо и молениемъ Заступницы нашея Царицы Владычицы Богородицы и Приснодѣвы Мария, еже къ Сыну Своему и Богу нашему приснымъ предстояниемъ, нынѣ же ради благодати Божия в сие в послѣднее время показа намъ праведное и всесвѣтлое солнце, и отверзе породу Едема затвореннаго, и яви отъ земли пресвѣтлую икону, источникъ неизчерпаемый, Своимъ человѣколюбнымъ смотрениемъ в земли сокрыему чюдотворную икону Матери Своея, а нашея Царицы, Владычицы Богородици и Приснодѣвы Мария честнаго ея Одегитрия, и Свой человѣколюбный образъ. Отнюду же убо праведный гнѣвъ Свой за наше согрѣшение испусти, оттуду близъ мѣста того, яко камени вержениемъ, и благодатию свѣтящую лучю и исцеления источникъ показа. Яви убо себе Богородицына икона сицевымъ образомъ. Не яви убо образа своего Владычица ни святителю града, ни начальнику властелинску, ниже вельможи или богату, ниже мудру старцу: но яви свое честное сокровище, источникъ неизсчерпаемый приходящимъ с вѣрою, чудный свой образъ, нѣкоего мужа от простыхъ, имуща мудрость на войнѣ стрелебную, сего дщи юнна, десяти лѣтъ суща, именемъ Матрона. Сей бо дѣвицы явися чюдная она и пресвѣтлая икона Богородицына. И после убо пожара в томъ же лѣте и месяце, сице нача являтися дѣвицы оной, ей же имя преди рекохомъ, икона пресвѣтлая Божия Матери. И веляше ей поити во градъ и повѣдати про икону Богородицыну, ея же видѣ, архиепископу и воеводамъ, дабы шед выняли образъ Пречистые Богородицы от земленыхъ нѣдръ: и мѣсто повѣда ей, идѣже последи обрѣтоша драгаго бисера честное сокровище, чюдную икону Богородицыну. Дѣвица же убо, юна и немыслена, боящеся повѣдати: и абие едва повѣда матери своей, мати же глаголы ея ни во что же вмѣнивъ. И послѣди же убо въ видѣнии не единою являшеся ей пресвѣтлая и чюдная она икона и веляше ей безъ сумнѣния сие видѣние повѣдати. Девица же не единою, но и многажды, сказоваше матери своей явление чюдные тоя божественыя иконы: веляше ей безъ сумнѣния повѣдати сие видѣние. Во единъ же убо день случися дѣвицы оной, ей же имя выше надписахомъ, спати в полудне: и внезапу дѣвица обрѣтеся посреди двора своего, в немъ же живяше, и абие явися ей чюдная и пресвѣтлая Богородицына икона страшнымъ огненнымъ образомъ, лучи испущая огнены, пресвѣтлы и страшны зѣло, яко мнѣтися ей от пресвѣтлыхъ тѣхъ лучъ, сияющихъ от иконы, сожжене быти. И гласъ бысть отъ образа страшенъ, къ дѣвице глаголющъ: «аще убо не повѣси глаголъ Моихъ и не пойдеши от земленыхъ нѣдръ выняти образа Моего, Азъ же убо имамъ во иной улицы явитися и во иномъ граде, ты же имаши болѣзнена быти, дондеже и живота злѣ гонзнеши». Дѣвица же, от страшнаго сего видѣния зѣло ужасшеся, паде на землю и бысть яко мертва, и лежаше на земли на многъ часъ. И абие возопи велиимъ гласомъ к матери своей, дабы шедъ повѣдала архиепископу и правителемъ града того о чюдней и пресвѣтлей иконе Преблагословеныя Владычицы нашея Богородицы и Приснодѣвѣй Марии; и повѣда ей вся глаголы реченныя, яже слыша отъ пресвѣтлыя иконы, и мѣсто указуя. Мати же ея скоро иде во градъ к воеводамъ, и дѣвицу предъ ними представи; повеле ей, да сама глаголетъ, яже о ней содѣянная. Дѣвица же повѣда имъ вся глаголы реченныя, яже слыша от причюдныя и великолѣпныя Богородицины иконы, и мѣсто указуя. Они же убо, невѣриемъ одержими о пречестней Пречистыя иконе, о ней же девица повѣда, и ни во что же вмѣниша. Мати же прослезився, вземь дщерь, иде къ архиепископу, тѣ же предиреченныя повѣда глаголы и мѣсто указанное ей сказуя: дабы повелѣлъ выняти святую Богородицыну икону. Архиепископъ же не внятъ рѣчемъ ея и отосла ю бездѣлну: бѣ же приходъ ихъ въ седмый часъ дне, обрѣтоша же чюдный онъ пресвѣтлый образъ Богородицынъ въ часъ вторый на десять, по пожаре на томъ же лѣте, мѣсяца Июля въ 8 день, на память святаго великомученика Прокопия. Бысть же сице. Пойде убо жена та к дому своему, повѣдая всѣмъ людямъ о чюдней иконе: како видѣние видѣ дщи ея. Людие же, дивящеся о глаголехъ ея и отхождаху не внимающе речемъ ихъ. Она же, вземъ заступъ и пришедъ к показанному мѣсту, нача копати много время, и не обрѣте искомаго. Помале же убо начаша инии копати: и все уже мѣсто воскопаше, ничто же обрѣтше. Предиреченная же она дѣвица нача копати на мѣстѣ, идѣ же пещь бѣ; таже и прочии съ нею. И яко выкопаша мало боле двою лактей — оле чюдо! явися чюдотворная икона Владычицы нашия Богородицы и Приснодѣвы Мария, честнаго ея Одигитрия, купно с превѣчнымъ младенцемъ, Господемъ и Богомъ нашимъ Ісусомъ Христомъ. На чюднай же той иконе бѣ рукавъ однорядки сукна вишнева ветхъ; самый же чюдотворный образъ свѣтлостию чюдне сияя, якоже внове вапы начертанъ. Земному же праху никако же коснувшуся чюдному тому образу, яко-же сами видѣхомъ. Девица же, вземъ Пречистые образъ со страхомъ и трепетомъ и радостию, и поставиша на томъ же мѣсте. Людие же ту сущии возопиша, проповѣдающе немолчными гласы явление божественныя тоя иконы. И вскорѣ стекошася безчисленое множество благочестивыхъ народа, вопиюще со слезами: «Владычице, спаси ны!» И послаша вѣсть ко архиепископу и к первымъ града, яко обрѣтоша Богородицынъ святый образъ. Архиепископъ же повелѣ скоро в колоколъ звонити. И пойде со кресты на мѣсто то со всѣмъ освященнымъ соборомъ, идѣже обрѣтоша чюдную Пречистые икону, с воеводы и со множествомъ народа. I видѣ Пречистые образъ: яко-же новъ даръ пречюдне свѣтяшеся, и дивися убо зело, яко такова переводомъ образа не видѣша нигдѣ же, и недоумѣвашеся. Страхомъ убо и радостию одержими, невѣрия ради своего, с плачемъ моляся и милости прося, и прощения о согрѣшении. Сице же и воеводы с плачемъ просяще милости, еже согрѣшиша к чюдотворному Пречистые образу, нерадѣниемъ и невѣриемъ. И весь народъ града стекашеся, на дивное то божественное чюдо веселящеся, со слезами и радостною душею хвалу Богу и Богородицы, о обрѣтении многобогатаго и безцѣннаго сокровища возсылаху. Мнѣ же тогда в чину поповсте святаго Николы, иже зовется Гостинъ, каменосердеченъ же сый: но обаче прослезихся и припадохъ к Богородицыну образу, и к чюдотворней иконѣ и к превѣчному младенцу Спасу Христу, и потомъ поклонихся архиепископу, и благословение испросихъ о еже бы повелѣлъ взяти ми пречюдную Богородицыну икону; архиепископъ же благослови мя и повелѣ взяти ми. Азъ же, аще и недостоинъ сый, но обаче со страхомъ и радостию прикоснухся чюдотворному тому образу: и взяхъ з древца, иже бѣ поткнено на томъ мѣсте, идѣже въ земли бѣ святая та и чюдная икона. И по повелѣнию архиепископа, с прочими святыми иконами и честными кресты, идохъ со иконою въ близъ сущую ту церковь святаго Николы, иже зовется Тулский: и тамо, молебному пѣнию совершившуся, и паки архиепископъ со всѣмъ освященнымъ соборомъ, и первии града, и все множество православныхъ народа, со женами вкупѣ и детми, вслѣдъ святыхъ иконъ во градъ идущи. К новоявленней же чудотворней иконе безчисленое множество народа рѣяхуся, и другъ друга попирающе, инии же по главамъ инѣхъ ходяще, к чюдотворному образу тѣмены прикасахуся. Мнѣ же, по повелѣнию архиепископа, народа ради съ чюдотворною иконою медленно идущю, но обаче толикое множество народа не соврати мя ни на десно, ни на шуе: несох бо носящаго всю тварь, и того рождешей пречюдную и чудотворную икону. И въ той часъ Пречистые Богородицы образъ показа чюдо.

    Человѣка просителя, именемъ Иосиѳа, не видѣвша очима ни мало, яко самъ повѣда, три лѣта, — прозрѣти того Владычица сподоби. Враг же, не навидяй спасения человѣкомъ, забыти тому сотвори вскоре богатаго Врача, подавшего исцеления, Пречистую Богородицу. Еже бы воздати молитву и благодарения, вмѣсто того на прошение сребра паки устремися, ему же извыче: и вѣрою отпаде и лѣностию отягченъ, не получи до конца спасения. и невѣдѣния ради своего малу стезю зряше. Народи же, видѣвши чюдо, и болшую вѣру ко образу Пречистыя приложиша. И тако Пречистыя образъ, чюдотворную икону, внесоша въ соборную церковь Пресвятыя Богородицы честнаго и славнаго ея Благовѣщения. И ту в соборной церкви Владычица показа чюдо второе.

    Человѣка нѣкоего, именемъ Никиту, не видѣвша очима ни мало свѣта, прозрѣти того Богородица сподоби. Онъ же убо теплою вѣрою припаде къ чюдотворному Ея образу и получи здравие, хваля и славя Бога и Пречистую Богородицу. И тако, пѣвше молебная пѣния, абие отидоша въ домы своя со страхомъ и трепетомъ и радостию многою. На утрие же архиепископъ служивъ божественную литоргию; народи же вси, приходяще въ соборную церковь к чюдотворному образу и дароношение приносяще: инь злато, инь же сребро, и кто что можаше, кииждо по силѣ. Пречистая же Богородица нача являти чюдеса своя. Преже реченную же дѣвицу Матрену с материею ея почтоша архиепископъ же и воеводы и весь народъ. Чюдную же икону списавше и преславное явление чюдотворныя тоя иконы, и чюдеса, бываемыя отъ нея, написаша и послаша въ царствующий градъ на Москву к самодержавному царю Государю и великому Князю Ивану Васильевичю, всея Русии Самодержцу, и к сынома его — царевичю князю Ивану Ивановичю и царевичю князю Ѳеодору Ивановичю, нынѣ же Божиею благодатию Государь Царь и Великий Князь, Самодержецъ всея Русии. И видѣша убо христолюбивии царие чюдную икону Владычицы нашея Богородицы и Приснодѣвѣй Марии и честнаго ея Одегитрия и дивишася зело: яко такова образа переводомъ нигдѣ же не видѣша. Благовѣрный же Царь Государь и Великий Князь и сынове его повелѣша на томъ мѣсте церковь поставити, идѣже обретеся чюдотворная икона, и монастырь дѣвъ повелѣ устроити, и кѣлии поставити и ограду монастырю оградити, и милостыню доволну повелѣ дати изъ своей царские казны: священному собору и игуменье, и 40 сестрамъ урокъ лѣтний, еже и быстъ. И церковь поставиша во имя святыя Богородицы честнаго ея Одегитрия деревяну, и ограду монастырю сотвориша. Честную же ону и чюдотворную икону Пресвятыя Богородицы отнесоша в монастырь съ молебнымъ пѣниемъ со кресты: архиепискупъ и боляре со всѣмъ народомъ проводиша честно. Предиреченную же дѣвицу Матрену постригоша въ томъ же монастыри: и наречено бысть имя ей Мавра во инокихъ, не по мнозе же времени пострижеся и мати тоя дѣвицы. Поставиша же и другую церковь теплую с трапезою во имя Рождества Пречистыя Богородица. И абие нача являти Богородица чюдеса Своя.

    Человѣкъ нѣкто из Вияжскаго града лютѣ болѣзнию одержимъ бѣ и приведенъ бысть к пречистому и чюдотворному образу женою своею, и моляшеся с теплою вѣрою Богородицы и не отпаде прошения своего: получи здравие и отыде въ домъ свой радуяся.

    Нѣкогда убо отроча материею своею принесено въ церковь, слѣпо очима; мати же его стояше предъ образомъ Богородицы, с плачемъ моляшеся о прозрѣнии отрачате. Отроча же внезапу нача руками осязати по лицу матерь свою. Народи же убо вси молишеся Пречистыя образу; архиепископъ же стояше на мѣсте своемъ, зряше на отроча и видѣ сие, яко отроча матерь свою рукама осязаше. И повелѣ принести яблоко красно и показати отрочати. Отроча же и яблоко нача хватати: и вси истину увидѣвше, яко прозрѣ отроча; и славу воздаша Христу Богу и Пречистой Его Матери Владычицы нашея Богородицы, творяще дивная чюдеса.

    Нѣкто сынъ боярской, именемъ Ивашка тако нарицаемъ, прослутиемъ же Кузминской; у него же бѣ жена болна ногами: не можаше ими ни мало двигнути. Болѣзнь бо велми одержаше ю и ничимъ же себѣ не можаше помощи, но паче труднее бываше. И абие повелѣ себѣ принести к чюдотворному образу Пречистей Богородицы и, молебная отпѣвъ, со многою вѣрою и со слезами моляшеся, милости прося: и абие получи здравие, и отойде в домъ свой радуяся.

    Бысть же убо, в веси сына боярскаго Василия Рагозина, нѣкоего поселянина женѣ явися святая Богородица и веляше ити ей пречистому образу, иже есть в Казани, и повѣдати мужу своему, дабы шедъ молился чюдотворному образу. Она же не внятъ рѣчемъ Ея и мужу не сказа. Явижеся убо и второе сама Владычице: и абие нѣкая божественная сила взятъ руку ея и удари ю по лицу ея и бысть рука ея суха. Жена же прииде во градъ и повѣда все по ряду архіепископу случшаяся ей: и прииде к чудотворному образу, и получи здравие. И абие утвердися рука ея, якоже и другая. и отиде въ домъ свой радуяся.

    Человѣкъ нѣкто въ градѣ Казани, именемъ Исакъ, прорекломъ быкъ, нѣкоторыя вдовы сынъ, именемъ Улиты, вѣрны сущей, боящейся Бога, на посаде проскурни верховныхъ апостомъ Петра и Павла. И бысть в раслабленіи полтретия годы; болѣзнь же его бѣ всѣмъ знаема, живущимъ окрестъ: не можаше велми ногами и до полу. И посла матерь свою к чюдотворному образу Пречистыя Богородицы молебная пѣти. Самъ же убо в дому своемъ на одрѣ лежаще и начатъ со слезами предо образомъ плакати и молитися Пресвяте Богородицы, дабы ему самому видети чюдотворный Богородицынъ образъ. И в томъ часѣ видѣ себѣ мало легчайши отъ болѣзни: и абие милостию Пречистые Богородицы воставъ о собѣ на ногахъ и начатъ по малу поступати и, вземъ два посоха и абие подпираяся ими, пойде въ монастырь к чюдотворному всемилостивому Богородицы образу. О великихъ Ти чюдесъ, Богородице! матери со слезами о сыну молящися, сынъ же ненадежно и самъ в монастырь прииде: мати же его видѣ и изумися, и едва во умъ прииде, и нечаемое извѣстно увѣде. И приложиша к слезамъ слезы, молящеся Богородицы о исцелении: и тако до конца получи здравие. И воздаша хвалу и славу Господу Богу и Пречисте Богородицы, мѣсяца Апрѣля въ 30 день отойдоша во свой домъ, хваляще и славяще Бога, творящего дивная и преславная чюдеса.

Жена нѣкоего пришелца, Полоцкаго попа Григория. живяше в селѣ в Тагашевѣ (тако бо звашеся мѣсто то), именемъ Елена. Бысть же болна очима три лѣта и абие убо отъ многия тоя болѣзни и зракъ отъяся, якоже уже не видѣти ей ни мало. И услыша убо многая и преславная чюдеса отъ иконы Пречистые Богородицы во градѣ Казани, и пойде во градъ к чюдотворному образу милости просити. И еще убо ей недошедши града Казани яко седми поприщъ, и абие внезапу узрѣ свѣтъ очима и мнѣтися ей, яко николиже ими болна бѣ: и пришедъ в монастырь к чюдотворному образу, хвалу воздаде Господу Богу и Причистой Богородицы.

Читать далее...                    в формате PDF

по материалам сайта "Святоотеческое наследие"