в начало

---

    Повѣда намъ инокъ Иосиѳъ, иже нынѣ погребный ключникъ в дому Пречистыя (тогда же живя въ Троецкомъ монастырѣ, иже въ Казани): бысть, рече, болѣти ему очима, яко ни мала свѣта видѣти; и абие обѣщася молебная пѣти Пресвятѣй Богородицы. И егда приидоша священицы с чюдотворнымъ Пречистыя образомъ, в день недѣльный, в соборную церковь Пресвятыя Богородица честнаго и славнаго Ея Благовѣщения, к молебну, Иосифъ же у чюдотворнаго образа во время молебнаго пѣния моляся прилежно. И не получи исцеления, и отиде скорбенъ. И абие возлеже отъ болѣзни: и сведенъ бысть в сонъ тонокъ, и видитъ икону Святыя Богородицы. И бысть ему отъ иконы гласъ, глаголющь: «востани и пойди въ домъ Пречистыя, и отпой молебная, и утри лице свое пеленою и тако получиши исцеление». Онъ же, вставъ вскорѣ, и повелѣ себе вести в монастырь Пречистые Богородицы. И отпѣвъ молебная и повелѣ себе покропити святою водою, и пеленою Пречистыя утерся. И въ той часъ отъ очию его отбѣже болѣзнь: и узрѣ свѣтъ, и воздастъ славу Богу и Пречистей Богородицы.

    Нѣкто человѣкъ, именемъ Козма Окуловъ, Лаишескаво града, бысть во иступлении ума. Свои же ему совѣщаша итти в Казань к Пречистой Богородице в монастырь. Онъ же в себѣ бывъ и нача Пречистой Богородице о исцелении молитися: и помощию Пресвятыя Богородицы бысть ему облегчение, и прииде в монастырь и образъ Пречистые сподобися видѣти по своему обѣщанию, якоже обѣщася. И молебная пѣвъ и абие получивъ совершено исцеление, и бысть здравъ и отиде в домъ свой, радуяся и славя Бога и Пречистую Богородицу.

    Человѣкъ нѣкто во граде Казани, именемъ Онтонъ, прорекломъ Кажеваръ; ему же жена, именемъ Пелагия, не видѣ очима яко дней 40. Слышевъ же многия и преславныя чюдеса отъ Пречистыя Богородицы чюдотворнаго Ея образа, и в день недѣльный иде в монастырь Пречистые Богородицы. И многою вѣрою одержима бѣ, не погрѣши надежи, но получи изцеление. Егда убо приидоша с чюдотворною иконою Богородицыною с соборнаго пѣния молебнаго священицы, жене же той случися срѣсти икону Пречистыя, сошедъ съ паперти церковные: и абие въ той часъ прозрѣ, и отиде въ домъ свой, радующеся, хваля и славя Бога и Пречистую Богородицу.

    Человѣкъ нѣкий, именемъ Троѳимъ, Ларионовъ сынъ, Колмогорсково уѣзду, волости Листра острова, во граде Самаре впаде в болѣзнь и лютѣ трясавицею одержимъ; ктому-же на очи ему прииде тяжка болѣзнь. Онъ же, слышавъ Пречистыя Богородицы неизреченное милосердие, еже подаетъ отъ чудотворныя своея иконы неоскудное исцеление съ вѣрою молящимся ей, и нача молитися Пресвятѣй Богородицы о исцелении. И абие видитъ во снѣ икону Пречистыя Богородицы, стоящу в возглавии своемъ, и гласъ слышитъ от чюдотворныя тоя иконы, именемъ его зовущ: «иди, рече, во градъ Казань ко образу моему, и тамо изцеление получиши». Онъ же возбнувъ и почю в себѣ облегчение не мало отъ трясавицы; тако-же и очная болѣзнь не якоже исперва бѣ. И прииде во градъ Казань в монастырь Пречистые Богородицы во время святые литоргия, и нача пред образомъ Пречистые неутѣшно плакати и с вѣрою молитися, глаголя: «даждь ми, о Владычице, еже ми еси обѣщала; не малъ бо путь трудихся милосердия Твоего ради». И абие вскорѣ исцеление получи отъ обою болѣзней: и очима прозрѣ, и тѣломъ здравъ бысть. И славя Бога и Пречистую Богородицу, повѣдая всѣмъ людямъ дивная и преславная от Пречистые иконы милосердие ея и скорое свое исцсление.

    Во граде Свияжскомъ попъ бѣ, ему-же имя Иванъ, церкви святаго великого чюдотворца Николы, иже зовется Жилецкой; ему-же жена, имя ей Домна. И по дѣйству дияволю, нѣкая сусѣда ея, или любви ради, или хотя надъ нею бѣду сотворити, в запойство упои ея, до токова зла. Идущи ей въ домъ свой, толикъ срамъ нанесе мужу своему и себѣ, яко и главотязю не обрѣстися на ней; людемъ же многимъ позоръ дѣющимъ, инѣмъ же и скорбящимъ о таковѣй срамотѣ: понеже мужъ ея человѣкъ искусенъ бѣ и ненавидя пьянства, и злыхъ ошаяся, яко же и всѣмъ намъ знати его. Самого-же попа того не бѣ тогда во граде, но бѣ отлучился нѣкоего ради орудия. Жене же его на утрия і от сродникъ своихъ домашнихъ слышавше сотворившая ей напасть, впаде во отчадние и въ болѣзнь тяжку зѣло, ово страха ради, ово срама ради: и нача злымъ бѣсомъ одержима быти. И бѣ болѣзнь ея люта зѣло: на кийждо день и нощь до десятижды и вящи случашеся ей лютая та нестерпимая бѣда, зубы скрегча и пѣны теща, и составы членовныя троскотаху злѣ, якоже самъ попъ Иванъ повѣда намъ. И бѣ тако бѣднѣ стража до тридесяти пяти недѣль. Попъ же той Иванъ, безпрестани моля Бога и Пречистую Богородицу о исцелении жены своей и святыхъ угодникъ Божиихъ призывая в помощь, не единощи же и в Казань к чюдотворному образу Пречистыя Богородице привозя жену свою. И не получи ни мало отрады. Во сто же первомъ году, Ѳевраля въ 7 день, паки привезе жену свою в монастырь къ Пречистѣй Богородицы: и начаша со многими слезами молити Бога о исцелении ея. Ѳевраля жъ 11 день бысть гласъ во снѣ игуменье монастыря Марье, дабы повелѣла бѣсную к чюдотворному образу прикладывати в то время, егда учнетъ бѣсъ томити ея. Игуменья же Марья вскоре повелѣ тому быти. И егда нача бѣсъ томити ея, и вземше бѣснующуюся, приложиша к чюдотворному образу Пресвятыя Богородицы: и абие, въ той часъ, бысть недвижима отъ лютаго бѣса, и обрѣтеся здрава. И многу хвалу и благодарение воздаша Богу и Пречистой Богородице и идоша въ домъ свой, славяще Бога.

    Во граде жъ Казани человѣкъ нѣкто, именемъ Дмитрей, прорекломъ Тоскутей, ремествомъ скорнякъ; ему-же жена, имя ей Домна. Случися ей болѣзнь тяжка зѣло, рукама и ногама скорчившимся. И лютѣ болѣзни той притужающи ей, яко зрящимъ на ню умилнѣ плакати. Дщи же ея, именемъ Неонила, девица, тою же болѣзнию злѣ одержима: по всему убо яко и мати ея страдаше. И в болѣзни своей къ Пречистой Богородицы умилныя глаголы со слезами вопияху, о исцелении молящеся, простягщи же ся имъ болѣзни той на мѣсячное. Дмитрей же, вземъ жену свою, и отвезе ю в монастырь в церковь Пресвятыя Владычицы нашия Богородицы, честнаго и чюдотворнаго образа явления. Жена же его нача со слезами и с воплемъ многимъ молитися Пречистой Богородице о исцелении, яко и незнающимъ ея рыдати и плакати. Дмитрей же отходитъ въ домъ свой, хотя и дщерь пояти къ Богородицыну чюдотворному образу. И абие ненадежно радость обрѣте: пришедъ в домъ свой, и видѣ дщерь свою здраву и ничтоже отъ болѣзни страждущу. И благодаря Бога и Пречистую Богородицу, иде вскорѣ к женѣ — повѣдати ей изцеление дщери своея. Времяни же тогда бывшу чтому на литоргии святому евангелию, въ самое же то святое благовѣстие, пременися отъ недуга и жена его: и бысть здрава, яко николиже болѣвъ. Оле чюдо! во единъ часъ, по дѣйству дияволю, дщи и мати люту скорбь болѣзнену восприяша: во единъ же часъ от чюдотворныя Богородицыни пречюдныя иконы и исцеление восприяша. Дмитрей же и вси людие видѣша предивное скорое, Пречистою Богородицею, жене своей и дщери от болѣзни пременение; сугубо воздаша Богу и Пречистой Богородицы благодарение. Вопрошаху же жены его: како имъ найде со дщерию равенство недуга і во едино время? она же исповѣда подробну: «бывши ей, рече, у нѣкоего сосѣда на обѣде, и по времени иде въ домъ свой, и найде на пути платъ малъ завязанъ, и подъемъ его, и принесе въ домъ свой; и развѣза платъ той — обрѣте в немъ едину сребреницу да два орѣха; и единъ орѣхъ сама снѣсть, другой же дщери вда: от того и пострадаша».

    Человѣкъ нѣкто, именемъ Оѳонасей, Ероѳѣевъ сынъ, Ярославецъ, в день недѣльный приведенъ бысть в соборную церковь Пречистыя Богородицы честнаго Ея Благовѣщения. И многими человѣцы едва одолѣнъ бысть внити в церковь: бѣ бо бѣснуяся и рѣяся зѣло, и никако же взирая, и не глаголя ничто же. Тогда же бѣ, яко же обычай, и чюдотворная Богородицына икона принесена въ соборную церковь: и поставиша его предъ мѣстнымъ образомъ Пречистые Богородицы честнаго и славнаго Ея Благовѣщения и предъ чюдотворною Богородицыною иконою. Онъ же никако же смотря, ниже глаголя. По отпѣтии же молебновъ, вземъ святыя воды и покропихъ его: онъ же воззрѣвъ и нача по малу во умъ приходити. И видѣвъ образъ Пресвятыя Богородицы и рече: «Пречистая» и ту приложиша его къ Богородицину чюдотворному образу и къ прочимъ святымъ иконамъ. И по малѣ нача глаголати. Молебному же пѣнию совершившуся и чудотворней иконе въ монастырь пошедше, намъ же святую и чюдотворную Богородицыну икону, яко же обычей, проводіхомъ. Тому же Оѳонасью в соборную церковь возвратитися повелѣхомъ, божественныя ради литоргия. И егда начаша чести святое евангеліе, той же предиреченный Аѳонасие совершено исцелѣ молитвами Пресвятыя Владычицы нашея Богородицы, юже приноситъ о всѣхъ насъ къ Сыну Своему, Христу Богу нашему. Намъ же, вопрошающимъ его о содѣянныхъ, яже о немъ: что и како исперва прилучися болѣзнь ему? онъ же повѣда: «видѣхъ, рече, въ нощи, яко приидоша многи толпы бѣсовъ и претяху ему мукою, и показующе ему мечты своими, яко бы взношаху его на высоту и низпущаху долѣ, и ина злая дѣюще ему. Болѣзнь же его бѣ двѣ седмицы. Милостию же Божиею и молениемъ Пречистыя Богородица отиде въ домъ свой здравъ, радуяся и хваля Бога и Пречистую Богородицу.

    Сожительствуя же ми в кѣльи моей инокъ Арсеній, зовомый Высокий, иже послѣди бысть архимаритъ монастыря святаго Спасова Преображения. И прилучися ему болѣти ногою: болѣзнь же ту нарицаху камчюгъ, инии же инако зваху. Мы же тому неразсудни суще, не вѣдяху имени болѣзни той; но обаче болѣзнь крѣпка зѣло, яко едва мощи ему мало ступати нужи ради и здоровою ногою: ис кѣлии же, кромѣ великия нужа, никако-же исходити ему, болѣзни тоя ради. В тоже время и повелѣние отъ Самодержавного Государя Царя и Великого Князя Ѳеодора Ивановича всея Руси прииде къ намъ, по молению иноковъ монастыря боголѣпново Спасова Преображения, иже въ Казани, благословити и поставити предипомянутого Арсенья архимаритомъ. Тогда же поставити его не бѣ мочно, зѣлныя ради его болѣзни. Приспѣвшу же празнику Преполовения (въ онь же день святая и апостольская церкви празнество повсюду прия исходити с литиею и молебная пѣния совершати), мнѣ же ис кѣлия въ церковь еще не изшедшу, съ чюдотворнаю же Богородицынаю иконаю приидоша священіцы, якоже обычей. Предипомянутый же Арсеней во оконце смотря и со слезами Богородице о исцелении моляся. И внезапу нача с великимъ рыданиемъ плакати и благодарити Бога и Пречистую Богородицу, повѣдая своей болѣзни изцеление. Токмо, рече, гласъ испустихъ и прослезихся, Богородица же вскорѣ милосердие Свое показа на мнѣ И той часъ иде ис келия в соборную церковь самъ о себѣ. И пришедъ в церковь, пѣвъ молебенъ и благодарение воздая Богу и Пречистой Богородицы о исцелении своемъ.

Отъ образа же Пречистые Богородицы неисчетно многа исцеления подаваются приходящимъ с вѣрою. Но обаче доволно и по ряду хто возможетъ исписати Богородицыны чюдеса? дерзнухъ бо написати от великихъ малая, ина же многа преминухъ: земли убо широта, и морю глубина, и Богородицына чюдеса неизочтена. Сия же написахъ, яко да не забвению предана будутъ в послѣдняя времена.

Благочестивому же и Самодержавному Государю Царю и Великому Князю Ѳеодору Ивановичу всея Русии исперва, отнелѣ же явися целебный источникъ — икона чюдотворная Пресвятыя Владычицы нашея Богородицы, вся сия знаема суть. И вѣрою теплою и духомъ горя, яко же слышахъ отъ его царскихъ устъ ко мнѣ, рабу его и богомолцу, глаголемая въ то время, егда повелѣ мя Божиимъ изволениемъ устроити въ чинъ митрополита. Слышахомъ, рече, о милостивнемъ неизреченнемъ человѣколюбии Божии и Пречистыя Богородицы на насъ: како яви Богородица чюдотворную и пречюдную свою икону в нашей отчінѣ Казани, простирая к намъ милость свою; и како подаетъ неизреченныя целбы съ вѣрою приходящимъ. И хощу, рече, недостаточная исполнити, еже и бысть. Повелениемъ его царским, въ лѣта 7102 [1594] в недѣлю святыхъ женъ міроносицъ, Апрѣля 14 день, на память иже во святыхъ отца нашего Мартина папы Римскаго, заложенъ бысть храмъ предивенъ каменъ Пречистыя Владычицы нашея Богородицы и Приснодѣвы Мария честнаго и славнаго Ея Одигитрія чюдотворнаго образа явления, а в предѣле храмъ честнаго и славнаго Ея Успения; другой предѣлъ святаго благовѣрнаго великаго князя Александра Невскаго, во иноцехъ Алексія, новаго чюдотворца. Священа же бысть святая та церковь и с придѣлы 7103 [1594] г. Октебря 27 дня в недѣлю, на память святаго мученика Нестера, гдѣ Iсусъ болшой обложенъ сребромъ того же лѣта; и тѣми мѣстными иконами и книгами, и ризами, и прочими церковными потребами повелѣ Государь Благочестивый Царь и Великий Князь Ѳеодоръ Ивановичъ, всея Русии Самодержецъ, удоволити, еже и бысть. Самую же ту пречюдную и чюдотворную Пречистыя Богородицы икону златомъ и камениемъ драгимъ и жемчюгомъ великимъ предивне украси царскихъ сокровищъ хранитель Деменша Ивановичъ Черемисиновъ. Инокинь же старицъ въ монастырѣ 64. Хлѣбъ имъ и денги и прочая потребная из царские казны.

Мы же Божиею благодатию и Пречистые Богородицы чюдотворнымъ Ея образомъ хвалимся и веселимся и воспѣваемъ пѣснь побѣдную Сотворшему дивная чюдеса, во Троицы славимому Богу, Отцу и Сыну и Святому Духу нынѣ и присно и во вѣки вѣкомъ. Аминь.

_______________________________

Печатается по изданiю: Творенiя святѣйшаго Гермогена, Патрiарха Московскаго и всея Россiи. Съ приложенiемъ чина поставленiя въ Патрiарха. – Изданiе Церковной Комиссiи по чествованiю юбилейныхъ событiй 1612, 1613 и 1812 годовъ. – М.: Печатня А. И. Снегиревой, 1912. – с. 1-16.

в начало                   в формате PDF

по материалам сайта "Святоотеческое наследие"